Ferð í unglingadeild Kyndils

Nokkrir drengir í 7. bekk fóru nýlega í heimsókn til unglingadeildar Björgunarsveitarinnar Kyndill í Mosfellsbæ 9. apríl.  Var þetta gert á vegum smiðju - Útiskóli sem þeir hafa valið.

Í heimsókninni fengu þeir að taka þátt í fjölbreyttum og skemmtilegum verkefnum. Meðal annars var farið í hlutverkaleiki þar sem nemendur áttu að giska á mismunandi áverka og æfa sig í að bregðast við þeim. Þetta vakti mikinn áhuga og var bæði fræðandi og skemmtilegt. Einnig voru fleiri leikir og æfingar sem reyndu á samvinnu og útsjónarsemi.

 

Hluti af heimsókninni fór fram utandyra þar sem nemendur fengu að prófa sig áfram í aðstæðum sem tengjast starfi björgunarsveita.

 

Unglingadeild Björgunarsveitarinnar er fyrir börn og unglinga  á aldrinum 13 ára (8. bekkur) upp í 18 ára. Öll börn eru velkomin og þátttaka er gjaldfrjáls. Æfingar fara fram á fimmtudögum kl. 19:30–21:30. Mikilvægt er að mæta klædd eftir veðri þar sem stundum er farið út.

 

Heimsóknin gaf nemendum góða innsýn í starfið og hvað það felur í sér og tókst afar vel. Nemendur voru mjög ánægðir með daginn.